تفاصيل المقال
الرئيسية الركن الاعلامى المقالات
banner

رشحنا لك

طلب الكتاب

9789772786961-600x855
الرواية المصرية في ضوء المناهج النقدية الحديثة

أ.د/وجيه يعقوب السيد

أدب
70 جنية 100 جنية

طلب الكتاب

9789772786879-600x857
موازنة بين منهجي مدرسة المنار ومدرسة الأمناء في التفسير وعلوم القرآن

أ.د/رمضان خميس الغريب

اسلامى
100.00 جنية

طلب الكتاب

حقوق-الانسان-لاعلاقة-لها-
حقوق الإنسان لاعلاقة لها بالكفر والإيمان

سالم عبد الجليل

اسلامى
35 جنية

ملف بمواضيع رمضان

بسمة هنداوي
23/مايو/2020
شارك عبر:
كبسولة رمضانية


 

لو بتعمل طاعة الشيطان مش هيسيبك 
هيعطلك مرة بأي  حاجة
هيحبطك مرة 
هيشكك في إخلاصك فتفكر توقف الطاعة
هيزهقك مرة
هيسخرلك اللي يوقفك عن الطاعة

وغيره وغيره 
فاحذر كيده واستعن بالله عليه  تنل رضا الله والتيسير والتوفيق

سؤال للشطار للشطار 

  • صحابية كان لها دور بارز في خدمة هذا الدين. 
  • من أهل مكة لكنها ولدت في بلد نصراني ولا يتكلم العربية ورغم ذلك لم تتأثر بما كانوا عليه.
  • في طفولتها لم تزر مكة ولا المدينة لكنها أحبت النبي صلى الله عليه وسلم لأن اسمه وأقواله وأفعاله كانت تتردد كثيرًا في بيتها.
  • كانت طفلة ناضجة، معتزة بهويتها، منطلقة للتعبير عن حبها ممن أحبت.
  • أول لقاء لها مع رسول الله صلى الله عليه وسلم وهي في التاسعة من العمر .
  • لم تكن تعني لها لغتها الحبشية مجرد لغة بل كانت تعتبرها ثقافة بلد و تنشر الإسلام في بلدها بهذه اللغة.
  • من أهم إنجازاتها أنها عاصرت صغار التابعيات وربطتهم بالرسول صلى الله عليه وسلم كما ارتبطت هي به من خلال قصص أبيها عنه.
  • تزوجت أحد العشرة المبشرين بالجنة، وأنجبت ذكورًا وإناثًا فكانت نِعمَ الزوجة الصالحة والأم المربية.

فمن هي هذه الصحابية ؟؟؟؟؟


**************************************************************

من فترة لقيت أخت حامل  بتسأل عن دواء معين محتاجاه ومش هتقدر تجيبه لأنه  غالي عليها  فلو حد عنده فائض يدهولها

فأنا كنت بستخدم الدواء ده في فترة  وأتذكر إن عندي منه كام علبة ومش محتاجاه 

فطلعت شنطة الأدوية اللي عندي أبحث عنه 

لقيته بفضل الله وصلاحيته كويسة 

بس صدمت من كمية الأدوية اللي عندي لكن صلاحيتها انتهت وأنا مش واخدة بالي ومركونين 

حزنت جدا اني مبعملش جرد كل فترة وأطلع اللي مش محتاجاه لأي  حد محتاج بدل ما كان مصيرهم القمامة 

وشعرت بالذنب الشديد ..  لذلك أذكر نفسي وإياكم بعمل جرد مستمر للأدوية  اللي عندكم و تخرجي اللي فائض وصلاحيته سارية لأي  جمعية خيرية أو  أي  فقير محتاج  وربنا يجعله في ميزان حسناتك

بالنسبة للأدوية  اللي صلاحيتها انتهت متنسيش تعدميها قبل التخلص منها 

زي تفريغ الأقراص من اشرطتها أو رمي محتوي أي زجاجة دواء قبل رميها او تفريغ اكياس الفوار واللبوس من أغلفتها 

أوعي  ترمي الأدوية المنتهية كدة من غير إعدامها علشان معدومي الضمير كتير اليومين دول 

بارك الله فيكم 

أوعي تقبلي بعريس أصله لقطة

مفيش حاجة اسمها عريس لقطة

أوعي تتنازلي عن القبول وتقولي هتعود عليه بالوقت .. لازم يبقى فيه قبول حتى لو نسبة قليلة مش كبيرة 

ومش بقول حب.. مش منطقي تحبيه من أول  مرة

بقول قبووووووول

ولو رفضتيه علشان مش متقبلاه رغم إنه عريس ممتاز... انتي مش بتتبطري على النعمة وربنا  مش هيعاقبك ويجيلك واحد زي **

حقك ترفضي علشان مفيش قبول او شكله مش عجبك

الزواج عفة.... اقبلي باللي حاسة إنه هيعفك ... ويملى عينك  عن  رجال الدنيا كلهم

وطبعا لازم خلق ودين معاهم 

(قبول و خلق ودين )  مهمين جدا مينفعش تتنازلي عن حاجة فيهم
*********************************************


فيه حاجات كتير بتيجي بعد فوات الأوان  فبتفقد بريقها ولمعانها في نفسية الواحد

زي إعتذار  متأخر  ... بعد ما اللي قصادك شبع زعل لدرجة إنه  مبقاش فارق معاه اللي مزعله

زي مكالمة تليفون اتأخرت أوي لدرجة أن اللي المفروض تتصل به اصبح غير متاح 

زي مباركة  على نجاح أو  زواج أو غيره .. ولسان حالك .. ياااه أنت  لسة فاكر! ده أنا  نفسي نسيت 

زي كلمة حلوة  تعليقا على حاجة تعبت فيها  وملقتهاش 

زي رد فعل معين كنت منتظره من حد  معين في وقت معين  وبرده  مفيش

أوعى  تتأخر على حد منتظر منك حاجة .. تفاعلك مع الناس سواء برد فعل حقيقي أو تهنئة أو حتى ابتسامة .. نوع من جبر الخواطر  

ولو أتأخر شوية   هيسيب أثر مزعج وخذلان فظيع في النفسية 

متتأخروش على اللي بتحبوهم .. وعبروا عن مشاعركم ... وأظهروا  إعجابكم .. وقولوا كلمة حلوة .. وابتسموا ابتسامة صافية .. وشجعوا وعلوا الهمة .. اعتذروا بسرعة متتأخروش...  قولها تسلم إيدك الأكل  تحفة .. قوليله ربنا ما يحرمناش منك بتتعب كتير علشانا ....  اتصل بسرعة واطمن على أهلك وأصحابك .. بارك نجاح وزواج حبايبك ...

خليك حاجة جميلة  في حياة الناس .. بتبعث تفاؤل وطاقة إيجابية  للي حواليك .. ❤

***************************************************************************

دعاء الشئ المفقود ده سحر والله

( اللهم ياجامع الناس إلى  يوم لا ريب فيه اجمع عليا ضالتي )

ما فيش شئ يضيع وتقوله إلا وتلاقيه

لما كنت في الكلية وبمتحن وفيه إجابة مذاكراها بس مش قادرة اجمعها او نسياها 

كنت أقول(اللهم يا جامع الناس إلى  يوم لا ريب فيه اجمع عليا  إجابتي )

كانت الإجابة  تحضر في ذهني مباشرة 

بس كنت دايما بعد ما أذاكر أي حاجة أقول 

اللهم إني استودعك ما حفظت وما قرأت  وما فهمت فرده لي عند حاجتي إليه 

جربوا وهتشوفوا العجب

وده يعلمنا اننا نستعين بالله في كل حاجة حتى لو بسيطة 

لو ضايع منك قلم  حاجة ملهاش قيمة كبيرة .. بس قلت الدعاء يعني استعنت بالله ..باذن الله هتلاقيه 

لو ذاكرت حاجة صعبة واستودعتها عند ربنا متقلقش هتكون محفوظة 

الحمد لله أن لنا رب إذا استعنا به أعاننا 😊

قال تعالى في سورة الجن آية  ١٣ (فمن يؤمن بربه فلا يخاف بخسا ولا رهقا )

من الإيمان بالله  ألا  تستعن إلا  به
*********************************************


قوم نوح من أشد الأقوام  عنادا 

وأطول  مدة  استغرقت للدعوة كانت في عهد  سيدنا نوح عليه السلام

استخدم معاهم كل سبل الدعوة  وكل الأوقات 

دعاهم ليلا ونهارا.. جهرا وسرا .. إظهار  قدرات الله  في الخلق وتأمل الكون ... بالترهيب والترغيب 

ومع كل ذلك كانوا  بيزدادوا عنادا وعصيان 

وعبدوا الأصنام  التي لا تنفع ولا تضر

ودا وسوعا ويغوث ويعوق ونسرا

دول اصلا كانوا اسامي ناس صالحة ولما ماتوا .. اهلهم عملوا تماثيل لهم تكريما وتعظيما وليس عبادة

ومع  تعاقب الأجيال  اندثر السبب الحقيقي لهذة التماثيل

والأجيال  اللي طالعة اعتقدوا انها تماثيل لآلهة وعبدوها 

عناد وكفر وعصيان ... لدرجة أن  نبي الله نوح خشي على عباد الله من نسلهم..  فطلب من الله أن ينسفهم نسفا من على الأرض  لايبقى لهم دارا قائمة على الأرض 

سورة نوح جاءت بعد سورة المعارج والحاقة والقلم 

لتثبيت الرسول محمد صلى الله عليه وسلم وحثه على إكمال  رسالته
كنوع من ذكر معاناة الغير لتشجعيك على الصبر 

فقد اتهم بالشاعر والكاهن والمجنون في السور السابقة .. فجاءت هذة السورة لتهون عليه

ولذلك لنتدبر الآيات  ونأخذ منها  العبرة

وهي الصبر في الدعوة عامة ..  سواء على نطاق واسع كالدعاه وثقات الدين
او على نطاق ضيق .. كنطاق أسرتك وعائلتك وأصدقائك

ممكن تكون الشخص الوحيد الملتزم وسط أهلك وكمان بيهاجموك .. اصبر وادعوهم بالحسنى

ممكن تكوني الوحيدة المنتقبة او محجبة حجاب صحيح  ومنتقدة في وسطهم... اصبري وادعيهم بالحسنى 

ممكن زوجك مقصر شوية في بعض أمور الدين.. اصبري ولا تيأسي ... واستمري في تقديم النصيحة بالحسنى 

ممكن زوجتك.. أبوك... أمك.. ابنك.. أخوك .. أختك ..صديقك.. قريب لك

لا تيأس ... واصبر 

فالدعوة إلى  الله جهاد عظيم 

والأجر  على قدر المشقة 

رزقنا الله وإياكم الإخلاص  في القول والعمل

لا  تكن فيلا 

قرأت يوما أن الفيل لا يقيد بسلاسل بل بحبل قصير من قدميه لا يسمن ولا يغني من جوع .. ومع ذلك لا يحاول  أبدا أن يفك القيد  

وكان السبب عندما سأل  أحدهم راعي الفيلة عن السبب 

قال أن الفيل يقيد منذ ولادته  بهذا الحبل .. فلا يستطيع الحركة  فيطبع في ذهنه أنه  عاجز عن التحرر 

فلا يحاول مرة أخرى

فمن فضلك لا تكن فيلا .. وترتكن إلى  الروتينية في الحياة .. بل اسعى لتجديد .. كن إيجابي  .. أحرص  على التغيير   إلى  الأفضل 

لا  تيأس إن فشلت في مرحلة من مراحل حياتك 

حاول ثم حاول حتى لو فشلت 

فأول  خطوات النجاح الفشل 

لا تكن فيلا .. بل كن إنسانا

****************************************************


بص حواليك.... شوف اصحابك ... شوف لو أستمريت معاهم 

نهاية الطريق جنة ولا نار 

شوف مجالسكم كلها غيبة ونميمة ومضيعة للوقت ولا ذكر وطاعة وقول طيب يرضاه الله

شوف لو قبضت روحك وأنت قاعد معاهم ... هتفتخر إنهم أصدقائك يوم أن تبعث أم لا 

هل هتبعث على طاعة لو مت وأنت وسطهم ولا مجالسكم كلها لهو ومعصية !!

راجع نفسك ..والحق كون صحبة صالحة 

ابعد عن أي صديق سوء... والله هو قنبلة موقوته متحركة معاك ..

خلي بالك

الصاحب ساحب

يا يسحبك للجنة 

يا يسحبك للنار

فاختار طريقك من دلوقتي .

  عندما ترفع عينيك إلى السماء  وتنظر بتمعن وهي غارقة بالدموع وقلب مقهور ونفس مظلومة .. 

وتقول يارب 

تشعر وكأنك أنعزلت عن ما حولك ..لا تسمع ما يقولون .. ولا تبالي بوجود أحدهم

أنت اﻵن مع الله... في حديث خاص 

تبث إليه شكواك .. بدمع العين .. ووجع القلب .. بشعور شخص غرق في بحر الابتلاء 

فربك يعلم ما بك جيدا .. ولكن عندما تتحدث إليه وتشكو إليه.. تشعر وكأنك تستمد طاقة راحة هائلة تملأ قلبك 

تشعر أن الله لن يخزلك ..فأنت لجأت اليه 

ربك الوحيد الذي إذا لجأت اليه ..حتى وإن كنت غارق في المعاصي .. نجاك ..ورفع عنك 

عجباً.. لما نلجأ لغير الله ..وهو معنا

هو القوي ..الذي بيده كشف الغمة 

لما نلجأ لبشر لا حول لهم ولا قوة .. ومع ذلك قد تجدهم يتجاهلوا وجعك ويقسو عليك 

لما تلجأ اليهم ...ولما يتعجرفون هم ...!!

ارفع يدك أيها  المظلوم ..المكروب.. المهموم.. تحدث مع الله ..اشكو له ..ابك  بين يديه 

والله ثم والله بعد هذة الجلسة مع الله... ستخرج وكأن الدنيا أصغر ما يكون في نظرك .. وستعلم أن ليس لك غير الله 

فلا تلجأ لأحد غيره 

ولا تجادل أمام ظالم ... فقط فوض أمرك لله وقل يارب
*****************************************************************


كلمتي لكل شاب بيتسلي كتير بالبنات 

شوية مع توتو وبعدين مع سوسو وعلي اخر الشهر يتعلق بشهرزاد

عايزة أقولك  دول بنات ناس لهم قلب واحساس

ولازم تحترم أبوها اللي تعب فيها زمن طويل

معلشي هي برده طبعا غلطانة بس افتكر إنك أصلا انت السبب من البداية 

شغلتها وعملتلها ألف حكاية وحكاية 

عايزة تحب يبقي اختار طريق الصح

روح اتجوز وحب حب عفيف 

هتقولي دلوقتي الجواز لمن استطاع اليه سبيلا 

هقولك بس خد النية وربنا بيده  التيسير 

وافتكر  إنك  كل ما تطع الرب المعبود هتنول وتنول وتنول 

وكمان صحيح ياريت متدخلش من الشباك أصل باب البيت كبير ومن غير مفتاح

وكمان ياريت ابوها اللي يفتحلك مش البنوتة اللي تفتحلك

ايووة ما انت ممكن تدخل من الباب بس مش أبوها اللي يفتح الباب 

وانت اللي متحكم في كدة

يعني إنك تروح تقولها عايز ارتبط بيكي انت فعلا صادق واخدت النية ودخلت من الباب 

بس هي اللي فتحت الباب 

واحنا مش عايزين كدة 

عايزنها عزيزة مكرمة 

روح خبط علي الباب في الميعاد لما عم الحج يكون موجود عشان يقوم يفتحلك ويقولك اتفضل كمان ويقدملك جاتوه وحاجات حلوة من بتاع قعدات العرسان 

فهمتيني يابن الحلال

هتقولي وأنا أجيب  نمرة ابوها منين 

او عنوان مملكتها ده فين؟

هقولك يعني انت هتغلب ده مفيش حاجة بتوقف ادامك ياسوبر مان 

اتفقنا ياسيد الرجال

انت رايح علي فين ؟!

ده الشباك تعالي الطريق لباب اهو هناك  


من صفات الزوجة الصالحة إنها  تشجع زوجها على بر أهله (والده.. والدته .. إخواته)

ولو في يوم أنشغل وقصر، تنبهه وتلفت نظره إنه  بقاله كتير متواصلش معاهم

وأيضا من صفات الزوج الصالح إنه يبقى حريص إن زوجته تبقى متواصلة دائما مع أهلها ويحسن علاقته بيهم 

مش شطارة منك ولا منها  إنكم تبعدوا بعض  عن أهاليكم ... أو  حتى متنبهوش بعض إنكم  مقصر ين

وكله بأجره ... وأجر صلة الرحم عظيم  وسبب كبير لسعة الأرزاق 

وكما تدين تدان

بكرة هتكبر وعيالك يتزوجوا، والولد هيبقى له زوجة هتعمل نفس اللي عملتيه في شبابك

والبنت هيبقى لها زوج وهيعمل نفس اللي عملته في شبابك

فاتقوا الله ... والدنيا قصيرة فمتشوهوش مستقبلكم وعلاقتكم بأولادكم  بأيديكم ✋

متعاملش الفقير بكبر

متعاملش المريض بقرف

متعاملش اليتيم بنفور

متعاملش اطفال الشوارع بإزدراء

متعاملش المبتلى بتعالي 

متسخرش من ابتلاء حد

متعاقبش الناس دي على حاجة ملهمش ذنب فيها 

دول ناس زيهم زيك... بس ربنا اصطفاهم للإبتلاء 

دول ناس ربنا اختارلهم يتعبوا شوية في الدنيا وجزائهم في الاخرة عظيم 

دول ناس ربك بيحبهم ... بيكفر عن سيئاتهم 

دول ناس قد يكونوا احسن منك 

وان رحمك الله من ابتلائهم ... فاشكر الله ولا تعاقبهم على ابتلائهم 

انت ملكش ايد في النعمة اللي انت فيها ..كله بقدرة الله 

في لحظة تنزع منك كل النعم

فاتقوا الله فيهم وفي انفسكم

وادعي الله ان تكون جند من جنوده وتخفف عنهم البلاء

القرآن  من أعظم  العلوم ولعظمته فلا يؤتى إلا  بقوة 

بمعنى إن  عزمت  على دراسته فعليك أن تكون جادا فيه،  لا متهاون  ... مجتهدا لأقصى  حد وكثير التدرب  و كثير السماع 

اللهم أطلق  السنتنا فيه واجعلنا من متقنيه
****************************************

 

لو ربنا يسر لك طاعة معينة 

حاول ألا  تتركها فخير الأعمال  عند الله أدومها وإن قل 

لأن تيسير الطاعة ده   بيبقى فتح عظيم من ربنا  عليك ولازم تحسن شكر النعمة  بالتزامك بالطاعة دي 

لأن  لو اهملتها او قطعت عنها رغم انها ميسرة لك ... سيعقبه حرمان فظيع

ويبقى نفسك ترجع تعمل الطاعة دي تاني ومش عارف 

لانك ما استغلتش فتح الله عليك صح 

هوضح اكتر 

لو ميسر لك قيام الليل .. قومي ولا تكسلي  حتي لو بركعتين بقصارى السور 

لو ميسر لك حفظ القرآن   .. احفظي ولا تنقطعي 

لو ميسر لك صيام النوافل .. صومي 

وهكذا 

ربنا ييسر لنا الطاعات و يحببها إلى  قلوبنا

لما تكون السوشيال ميديا سبب لتفرقة الأسرة  وكل واحد لازق موبايله  في وشه ومش واخد باله انه عايش وسط ناس تبقى نقمة 

لما تخلي الزوج قاعد علي الموبايل  ... وسايب مراته المسكينة اللي بتكلم نفسها طول النهار والحجة انه بيرفه عن نفسه وطول  اليوم شغال .. تبقى نقمة 

لما تخلي الأم المسنة  تكلم ابنها  شحط كبير وهو باصص في موبايله  مبيرفعش عينه لهاولا مديها اهتمام لكلامها .. وهي ياعيني مستحملة  علشان فرحانه يزيارته و هو مفيش اي احترام ومتخيل انه كدة بار بها لانه زارها ... تبقى نقمة 

لما تخليك متتصلش باهلك وباصحابك وتكلمهم وتطمن عليهم بحجة انهم عندك فرند وبوستاتهم متقلقش .. تبقى نقمة 

الله المستعان
**************************************

 

احرص ان اخر حاجة ابنك يعملها قبل ما ينام انه يضحك

 واسمع ضحكتة واطمن انه سعيد 

اوعي تنيم ابنك حزين او معيط 

اوعى ... علشان متندمش

الأطفال  كائنات نقية شفافة .. متستحقش تنام معيطة مهما عملوا من مصايب 

صدقوني ان طفلك ينام بيضحك مستقر نفسيا  مش زعلان مهم ويقيه من أمراض  كتير وأحلام  سيئة 

لو مزعقاله على اي حاجة... حاولي مينامش الا وانتوا متصالحين وكمان بيضحك 

لو نام من غير ما تشعري وكنتي مزعقة له ... صحيه وضحكية وخليه ينام تاني 

النوم ده بعتبره نقطة فاصلة بينا وبين بعض

الشخص اللي نايم ده روحه عند ربنا ... متعرفش هترجعله تاني ويصحى ولا  لأ 

هتزعل اووي لو كان اخر حاجة لطفلك زعيق علشان كسر حاجة او عمل مشكلة 

متنيمش ابنك تعيس ... خليه ينام سعيد

******************************************


ويرسل الله لك شخصا يجعلك تبتسم وسط  حزنك  

يرسل لك من يدخل السرور على قلبك فيهون عليك 

فيصبح كبصيص النور البعيد الذي تراه في كهف حالك الظلمة بعد فقد الأمل  بالنجاة 

نعم ...

انها رحمة الله بعباده ... ولطفه بهم ❤

 

القاهرة - مصر

01152806533

01152806533
01012355714

elbasheer.marketing@gmail.com

حمل التطبيق
النشرة البريدية
اشترك فى النشرة البريدية
سجل بريدك الالكترونى ليصلك كل جديد
© جميع الحقوق محفوظة 2020 Keyframe